ನೀರುಪಾಲು...

ತೀರದ ತೀರದಿ ಒಣಗಿಹುದೆಲ್ಲ,
ನದಿಯ ನಲ್ಮೆಯ ಸ್ಪರ್ಷವಿಲ್ಲ;
ಸೋರದ ಮೋಡದ ಒಡಲು,
ಸುಡುತಿಹುದದರ ನೆರಳು;
ಇರದ ನೀರ ಮೇಲಾವ ಹಕ್ಕು,
ತಕ್ಕಡಿಯ ತಂತಿಗೂ ತಾಕೀತೆ ತುಕ್ಕು?

ಅರ್ಜಿ ಸಲ್ಲಿಸಿದ್ದು ಆಯಿತು,
ಅರಿಕೆ, ಆಗ್ರಹವೂ ಆಯಿತು,
ನದಿಯಂತೆಯೆ ನಂದಿದೆ ದನಿಯೂ,
ಆರಿದ ಕೊರಳಿಗೆ ಇಲ್ಲವು ಹನಿಯೂ;
ಪಾನಕ್ಕೆ ಇರದು ಪೈರಿಗೆ ಏಕೆ?
ಬೆಳೆಗೆರೆದು ನಾವು ಸೊರಗಬೇಕೆ?

ನಾಯಕ, ನ್ಯಾಯವಾದಿ ತೊರೆದರೆ,
ಯಾರಾಲಿಸುವರು ನಮ್ಮಯ ಮೊರೆ?
ವರುಣನ ಓಲೈಸಿ ವರ ಬೇಡಬೇಕೆ?
ವಿ‌ಜ್ಞಾನದ ವಿಸ್ಮಯಕೆ ಕಾಯಬೇಕೆ?
ಎಲ್ಲಿ ಅಡಗಿದೆ ಐಕ್ಯತೆ, ಒಗಟ್ಟು,
ಭಾವಕೇಕೆ ಭಾಷೆಯ ಅಣೆಕಟ್ಟು?